Dit jaor woele we ens un éch jônk trio en nao ein tiedje met de Prinsekemissie beejeingezaete te hebbe, kwaame we d’r al snel achter det ôzze aanstaonde Hoëgheid oët de gekste Vrindeclub van Hout-Bliërick meus kômme: VC LeeverGekker ! Neet umdet ze zoë gek ziën, maar umdet ze door al eur aktiviteite eine duudelike stempel drökke op ôs Hout-Bliërickse gemeinschap. Daoveur hoof ge allein maar te kiëke op eur sait www.leevergekker.nl, wao al ut Hout-Bliërickse niëjs dageliks wuurd beejgehalde. We hoofde dan auk neet mier langer te dinke: Laote we maar geliëk de “webmaster” van dees sait aan ziene jas gaon trekke!.

Op dinsdaag 13 september 2011waas ut dan zoëwiët: Twiëje daag nao ut Stockcarwiekend in Ingeland, had ôzze aanstaonde niëje hoëgheid ein vergadering beej Ruud Rutte. Um 10 oor   ‘saoves, toen de vergadering al lang waas aafgelaupe en Ruud um aan de lungel meus halde, kwaam Ton dao “toevallig” binnevalle um te vraoge of Niels Prins van de Poerkerplak in 2012 woej waere. Hae meus iërs ein paar kier slikke en woel ut d’r thoës met Ellen natuurlik effe euver hebbe, maar we kôste aan zien gezich zeen det hae d’r al vuul zin in had. Toen hae ut d’r met Ellen euver had gehad en ze alle twiëje de volgende daag, ônger ut werk, allein maar met de gedachte beej ut Prinseschap waare, woort ut Ellen te vuul en ging ut krank nao hoës. Of dit met de groëte Prins of met ut aanstaonde kleine prinsje te maake had, blief altiëd ein vraog ! Gelökkig zeije ze hiel snel jao en ginge we op zeuk nao de adjudante. Martijn woord gevraog nao de bloomeverkaup en zei zônder nao te dinke metein Jao ! Beej Ruud waas ut wet moeiliker: Dae zoot 3 waeke op Bali ! Beej thoëskôms waas hae echter hiel snel bereid um beej ziene vrind Niels adjudant te zien. Zoë hadde we ut trio van 2012 nao ôngeviër 3 waeke toch kompleet ! Ze hebbe alle dreej vuul zelfde interesses, ônger angere de “World Cup of Stockkarreeses” in Ingeland elk jaor bezeuke. Auk zien ze alle dreej ôngerdeil van ut kommitee Hiërezitting Hout-Bliërick, wao ze illik jaor waer eur bes doon um die zitting toet ein suukses te maake. Daonaeve zit ut komplete trio in de raod van elluf en natuurlik zien ze alle dreej fanatiek lid van Vrindegroep LeeverGekker.

Heejônger waere ze alle dreej effe veurgesteld:

Prins Niels I Vervoort is de Hout-Bliërickse vastelaovend met de paplaepel ingegaeve as zoon van Jos Vervoort (ald adjudant beej prins Ton I in 2004) en Miek van Wiel van Linssen Drees en kleinzoon van ald-prins Wiel I. Hae woënt sinds 2011 saame met zien vriendin Ellen Schreurs midde in ’t dörp en wal oppe Luuschwaeg. In juni van dit jaor verwachte zeej eur iërste kiendje. In 1999 waas hae auk al ens Poerker Jeugprins.

In ut dageliks laeve is hae as opzichter werkzaam beej Woëningcorporatie WoonWenz in Bliërick op de aafdeiling Planmatig Onderhoud wao hae saame met zien kollegaas d’r veur zörg det alle woëninge d’r piekfijn beej bliëve staon.

In ziene vreeje tiëd duit hae met vuul plezeer verschillend vreejwilligerswerk. Hae waas ein van de oprichters van Stichting Generation, mede-organisator van de Hout-Bliërickse Hiërezitting en fervent supporter van ut Stockcar reese. Hae geit dan auk illik jaor, vergezeld door zien twiëje adjudante en inkele angere LeeverGekkerts en un paar Daltons (ônger leiding van sirremoniemeister Patrick) nao de World Cup of Stockcar F1 in Ingeland.

Auk is hae al inkele jaore lid van ut bestuur van Carnavalsvereiniging de Poerker. As veurzitter van de PR kemissie zörg hae d’r met zien kollegaas veur det alle publikaties, drökwerk, borde, vlagge en sponsors weer op de juuste plek terech kômme. Daonaeve waas hae in 1999 Jeugprins oppe Poerkerplak.

Netuurlik meug neet vergaete waere det Niels vanaaf ut begin lid is van Vrindegroep LeeverGekker, de vrindegroep wao oët dit Trio is ôntstaon. Eine aktieve groep jônge (en maedjes) die altiëd gaer veurop gaon met alles wat d’r in ut dörp te doon is. Dao môt deeze vastelaovend wal hielemaol ut toënbeeld van zien!

Auk adjudant Ruud Keunen is de Vastelaovend met de paplaepel ingegaeve. As zoon van ald-Prins Frans II (zoon van Sjaak van Welles en Nel van Kaoles Trina) en Mariet Pennings oët Baolder is hae gebaore en getaoge in ut Brook oppe Poerkerplak. Al lange tiëd haet hae Susanne Kempen oët Bree aan zien zie.

In ut dageliks laeve werk hae as projekleider beej Konstruksiebedriëf Lemmen.
Reize duit Ruud auk gaer, illik jaor met de femilie op wintersport.

Al unne hiele tiëd is hae lid van de Poerker. Ôngerangere verköp hae twiëje kiër per jaor hoës aan hoës bloome um de vereinigingskas te spekke.Saame met zien kammeraoj is hae altiëd te vinge in ut dörp as d’r wet te doon velt. Zeeker deeze Vastelaovend zult geej zeen wiej zeej as groep veur op gaon tiedes de Vastelaovend.

27 joar geleeje is adjudant Martijn Davids op de Poalwaeg gebaore as zoon van Erik Davids
(adjudant in 1997 beej prins Thijs Joosten) en Marij Gerritsma (dochter van
Mientje van de lange van Peeters van Poal 70). Opgegreuijd op de
Molekampwaeg en sinds kort woënt hae op zien eige, in Hout-Bliericks niëjste wiëk, plan
Helmuswaeg. Heej haet hae de letste paar maonde de nuüdige tiëd en energie in gestoake.
In ut dageliks laeve werk hae tösse ut aafval beej Milieu Service Zuid (ut
bedriëf van zien elders), wat zich bezig held met de recycling van aafval.

Doaneave is hae sinds kort penningmeister van de Poerker en secretaris van Generation
en ut Spuithuuske. Rôndum ut vastelaovesseizoen is hae as lid van de
waagekemmissie auk nog bezig um d'r veur te zörge det de prinsewaage, de
jeugprinsewaage en de golde wage klaor staon. In 1998 is Martijn adjudant gewaes
beej Jeugprins Peter Huys.
In de wiekende is hae dök met zien vrinde saame te vinde

Alle dreej hebbe ze d’r ôntzettend zin in um deze vastelaovend toet ein knalfiës te maake !!